Pressemelding
Folk skal få hjelp uansett kor dei bur
Senterpartiet vedtok i ein uttale på sitt landsmøte fredag at alle nordmenn skal ha tilgang på grunnleggande statlege tenester.
«Alle, uansett kor dei bur, skal vere trygge på å få hjelp når dei treng det. Det krev politi der folk bur, ambulanse som når fram, og tryggleik for gode helsetenester i heile Noreg», seier helsepolitisk talsperson i Senterpartiet Kjersti Toppe.
Senterpartiet sin politikk står i sterk kontrast til Høgre sin sentraliseringspolitlikk, som mellom anna flytta politiet vekk frå nærmiljøa.
«Eit politi som er til stades i lokalsamfunnet skapar tryggleik, det byggjer tillit og hindrar lovbrot», seier Toppe.
Senterpartiet meiner at eit godt og likeverdig helsetilbod frå det offentlege i heile Noreg er avgjerande for tryggleiken til folk.
«Senterpartiet er imot nedskjering og strukturelle endringar i helsetenesta som fører til ein svekka akuttberedskap. Ingen liv skal verte sett i fare eller helsa bli skadelidande på grunn av dårleg beredskap og manglande ressursar. Folk skal ha tryggleik for dei grunnleggjande velferdstenestene, uavhengig av inntekt eller kor ein bur», avsluttar Toppe.
