Pressemelding

Samla overskot i statsbudsjettet og Statens pensjonsfond vart 148,6 milliardar kroner i 2017. Det oljekorrigerte underskotet i statsrekneskapen for 2017 vart 222,8 milliardar kroner, 8,6 milliardar lågare enn lagt til grunn i nysaldert budsjett.

Det syner statsrekneskapen som vart lagt fram i dag.

Inntektene vart 6,1 milliardar kroner høgare, medan utgiftene vart 2,5 milliardar kroner lågare enn i nysaldert budsjett som vart vedteke i desember 2017.

Det oljekorrigerte underskotet vart 36,7 milliardar kroner lågare enn i det salderte budsjettet som vart vedteke hausten 2016. Utgiftene vart 22,0 milliardar kroner lågare. Skatte- og avgiftsinntektene vart 8 milliardar kroner høgare, rente- og utbyteinntektene vart 2,7 mrd. kroner høgare, medan andre inntekter vart 4 milliardar kroner høgare. Avviket mellom budsjettet og rekneskapen for 2017 skil seg ikkje frå det som har vore normale avvik. Frå rekneskapen 2016 auka det oljekorrigerte underskotet med 14,4 milliardar kroner.

Målt ved det strukturelle, oljekorrigerte underskotet er bruken av petroleumsinntekter i 2017 no rekna til 214,0 milliardar kroner eller 2,8 prosent av Statens pensjonsfond utland (SPU) per 31.12.2016.

Kapitalen til Statens pensjonsfond auka med 1 002,2 milliardar kroner i 2017. Det meste av auken er knytt til SPU. Ved utgangen av 2017 er bokført verdi av SPU i kapitalrekneskapen 8 484,1 milliardar kroner, medan verdien av Statens pensjonsfond Noreg (SPN) er 240,2 milliardar kroner.

Faktaboks: Om statsrekneskapen
Finansdepartementet utarbeider årleg Stortingsmelding nr. 3 om statsrekneskapen. Meldinga har ei fast nummerering og vert send Stortinget innan 1. mai. Statsrekneskapen inneheld ein løyvingsrekneskap og ein kapitalrekneskap.

Kapittel 1 gjev ein samla presentasjon av statsrekneskapen og syner budsjettbalansen og samla overskot i statsbudsjettet og Statens pensjonsfond. Statens finansieringsbehov går òg fram. Kapittel 2 syner utviklinga av utgiftene under dei einskilde departementsområda. Kapittel 3 omtaler resultatet og utviklinga i Statens pensjonsfond. Kapittel 4 syner hovudtal i statens balanse (kapitalrekneskapen) med notar til viktige endringar. Kapittelet syner òg statens renteinntekter og -utgifter og statens garantiansvar.

Løyvingsrekneskapen syner utfallet i statsbudsjettet for kvar budsjettpost. Rekneskapsførte utgifter og inntekter, overført løyving frå forrige år, samla løyving og overført løyving til neste år går fram, jf. vedlegg 2.1 og 2.2 i meldinga.

Kapitalrekneskapen syner statens finansielle balanse med mellom anna statens kontantbehaldning, Statens pensjonsfond, aksjebehaldning, utlån frå statsbankane og statsgjelda, jf. vedlegg 3.1 i meldinga.

I vedlegg 1-5 i meldinga finst òg fleire tilleggsspesifikasjonar til rekneskapen, mellom anna som følgje av krav i Stortingets løyvingsreglement §13. Nytt frå 2017 er vedlegg 3.11 i meldinga med presentasjon av note om gjeldsbrevordninga under Utanriksdepartementet.

Portalen statsregnskapet.no har ei enkel og grafisk framstilling av statens inntekter og utgifter, og gjer det mogleg å samanlikne på tvers av statlege verksemder. Her kan ein også finne meir detaljerte rekneskapstall.